वैशाख १२ – स्पेनिस क्लब बार्सिलोनाका स्ट्राइकर लुइस स्वारेजले रियल मड्रिडका स्ट्राइकर क्रिष्टियानो रोनाल्डोलाई उछिनेका छन् । स्वारेज रोनाल्डोलाई पछि पार्दै यो सिजन ला लिगाको सर्वाधिक गोलकर्तामा पहिलो नम्बरमा उक्लिएका हुन् । ला लिगा अन्तर्गत शनिबार राति स्पोर्टिङ डी गिजोनसँगको खेलमा चार गोल गरेका स्वारेजले यो सिजन ला लिगामा ३४ गोल गरेका छन् । यो दोस्रो स्थानका रोनाल्डाको भन्दा तीन गोल बढी हो । रोनाल्डोले अहिलेसम्म ३१ गोल गरेका छन् । स्वारेजले २१ गोल घरेलु मैदानमा गरेका हुन् भने १३ गोल अरु क्लबको मैदानमा गरेका हुन् । रोनाल्डोले घरेलु मैदानमा २० तथा अरु क्लबको मैदानमा ११ गोल गरेका छन् । स्वारेजले यो सिजन अहिलेसम्म सबै प्रतियोगितामा गरेर ५३ गोल गरेका छन् । रोनाल्डोले यो सिजन अहिलेसम्म सबै प्रतियोगितमा गरी ४७ गोल गरेका छन् ।
